“20 Yanvar həqiqətlərinin dünya ictimaiyyətinə çatdırılmasında Ümummilli Lider Heydər Əliyevin rolu” mövzusunda Ucar Gənclər Evində dəyirmi masa keçirilib
Ucar Rayon İcra Hakimiyyətinin təşkilatçılığı ilə “20 Yanvar həqiqətlərinin dünya ictimaiyyətinə çatdırılmasında Ümummilli Lider Heydər Əliyevin rolu” mövzusunda Ucar Gənclər Evində dəyirmi masa keçirildi.
Tədbir iştirakçıları əvvəlcə şəhidlərimizin əziz xatirəsini bir dəqiqəlik sükutla yad etdilər.
Ucar Rayon İcra Hakimiyyəti Başçısının müavini-ictimai-siyasi və humanitar məsələlər şöbəsinin müdiri Aidə Qəhrəmanova çıxış edərək 1990-cı ilin yanvarında Sovet imperiyasının qoşun hissələrinin Azərbaycan xalqına, dinc əhaliyə qarşı törətdiyi cinayətlərin, faciə ilə bağlı həqiqətlərin dünya ictimaiyyətinə çatdırılmasında Ümummilli Lider Heydər Əliyevin müstəsna xidmətlərindən danışdı. Həmçinin qeyd etdi ki, 20 Yanvar faciəsinin həqiqətlərinin dünyaya çatdırılması, hadisəyə ilkin siyasi-hüquqi qiymət verilməsi məhz Ümummili Lider Heydər Əliyevin adı ilə bağlıdır. Azərbaycan xalqına qarşı törədilmiş cinayət olan 20 Yanvar hadisələri ilə əlaqədar ilk rəsmi etiraz da məhz Ulu Öndər Heydər Əliyev tərəfindən səsləndirildi. Yalnız Ümummilli Lider Heydər Əliyev həyatını təhlükə qarşısında qoyaraq hadisənin ertəsi günü Azərbaycanın Moskvadakı daimi nümayəndəliyinə gəldi, qanlı faciənin fəsadlarını olduğu kimi çatdırmaq üçün dünya ictimaiyyəti qarşısında qəzəbli, cəsarətli və ifşaedici bəyanatla çıxış etdi.
Boyat kənd tam orta məktəbin tarix müəllimi Aynur Yusifova çıxış edərək 1990-cı ilin Qanlı Yanvar hadisələri zamanı vətənin müdafiəsinə qalxmış, haqsızlıq və ədalətsizliyə qarşı öz haqq səsini ucaltmış dinc əhalinin Sovet qoşunları tərəfindən amansızcasına qətlə yetirildiyi faciənin yalnız Azərbaycan xalqına qarşı deyil, ümumbəşəri dəyərlərə, demokratiyaya qarşı törədilən cinayət əməli olduğunu bildirdi.
Tədbirdə Müharibə, Əmək və Silahlı Qüvvələr Veteranları Rayon Şurasının sədri Niyaz Xəlilov, Ucar rayonu üzrə Təhsil Sektorunun müdiri Rahib Bürcəliyev, Qarabağ Müharibəsi Əlilləri, Veteranları və Şəhid Ailələri İctimai Birliyinin rayon şöbəsinin sədri Rahib Rəsulov və Ağdaş Regional Mədəniyyət İdarəsinin Ucar rayonu üzrə nümayəndəsi Alı Babayev çıxış edərək 20 Yanvar həqiqətlərinin dünya ictimaiyyətinə çatdırılmasında Ümummilli Lider Heydər Əliyevin əvəzsiz rolundan danışdılar.
