Ucar rayonunda 65 yaşından yuxarı ahıl, tənha, aztəminatlı ailələrə yardımlar və dezinfeksiyaedici tədbirlər gündəlik olaraq davam etdirilir

06 may 2020-ci il tarixdə Rayon Polis şöbəsinin inzibati binası və həyəti, Babək küçəsində fərdi evlərin ön giriş hissələri və həyətləri, Xətai küçəsində fərdi evlərin giriş hissələri, həyətləri və açıq kanalizasiya xətləri, 20 Yanvar küçəsində fərdi yaşayış evlərinin giriş hissələri Rayon Gigiyena və Epidemiologiya Mərkəzi tərəfindən dezinfeksiya edilmiş, Zərdabi küçəsi dezinfeksiya məhlulu ilə yuyulmuşdur.

Rayonun kəndlərində 36 qeyri-yaşayış binasında, 65 ticarət və xidmət obyektində dezinfeksiya işləri aparılmışdır.

06 may 2020-ci il tarixdə sahibkarlar tərəfindən aztəminatlı 50 ailəyə, Başçının Qazıqumlaq kənd inzibati ərazi dairəsi üzrə nümayəndəliyinin təşəbbüsü ilə aztəminatlı 50 ailəyə yardım göstərilmişdir.

Aztəminatlı ailələrə və işsiz şəxslərə dövlət tərəfindən verilən vəsaitlərin “Kapital Bank”ın rayon şöbəsi və rayon Poçtamtı vasitəsilə verilməsi ilə əlaqədar olaraq həmin təşkilatlarda vətəndaşlar arasında sosial məsafə saxlanılması, gigiyenik qaydalara əməl olunması məqsədilə mobil qruplar və polis əməkdaşları tərəfindən müvafiq işlər aparılır, o cümlədən ərazi qırmızı lentlə əhatələnmiş, hər 2 metrdən bir işarələr çəkilmişdir. Həmçinin həmin vəsaitin bir hissəsinin yerlərdə vətəndaşlara çatdırılması da gündəlik təmin olunur.

Ümumiyyətlə, bütün rayon ərazisində tənha və kimsəsizlərlə gündəlik görüşülərək problemləri ilə maraqlanılır.

Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Ucar rayon şöbəsinin əməkdaşları tərəfindən rayon ərazisində yaşayan və qeydiyyatda olan 117 nəfər tək və kimsəsizlə hər gün əlaqə saxlanılır, problemləri öyrənilir və həftə ərzində hər birinə ən azı 4 saat xidmət göstərilir.

Əlavə olaraq rayon şöbəsi tərəfindən hazırda yaşı 65-dən yuxarı olan 41 nəfər qeydiyyata alınıb, onlara da mütəadi xidmət göstərilir, o cümlədən bu gün 24 nəfərinə xidmət göstərilmişdir.

Qeyd olunan bütün tənha və qoca şəxslərin evlərdə ərzaqla, tibbi ləvazimatla təminatı həyata keçirilir, maarifləndirici söhbətlər aparılır, yaranmış problemləri həll olunur.