Təhsil

          Rayonda aparılan uğurlu islahatlar nəticəsində əhalinin təhsil səviyyəsi artır və bu gün 15 yaş və yuxarı yaşda olan əhalinin hər 1000 nəfərindən 730-u ali və tam orta təhsilə malikdir.

          Hazırda rayon üzrə 44 ümumtəhsil məktəbində 11054 nəfər şagird təhsilə cəlb olunmuş, onların təlim-tərbiyəsi ilə 1075 nəfər müəllim məşğul olmuş, rayon üzrə müəllim-şagird nisbəti 10,3-ün 1-ə nisbətinə bərabər olmuşdur.

          Azərbaycan Respublikası Nazirlər Kabinetinin 11 iyul 2016-cı il tarixli 271 nömrəli qərarına əsasən məktəbəqədər yaşlı uşaqların ümumi təhsil prosesinə hazırlığının təmin olunması məqsədiilə cari dərsi ilində də rayon üzrə 41 məktəbdə 52 qrupda 773 nəfər 5 yaşlı uşaq təhsilə cəlb olunmuşdur.

          Qeyd olunan dövrdə məktəblərin maddi-texniki bazasının möhkəmləndirilməsi, yenidən qurulması diqqət mərkəzində olmuş, müasir tədris avadanlığı və informasiya-kommunikasiya texnologiyaları ilə təminat sahəsində lazımi tədbirlər görülmüşdür.

          Rayon üzrə məktəblərin əksəriyyəti, başqa sözlə 44 məktəbdən 43-ü internet şəbəkəsinə qoşulmuş, kompyuterlə təminat yaxşılaşdırılmışdır.

          2023-cü ilin iyun ayında ibtidai sinif və Azərbaycan dili və ədəbiyyatı müəllimləri Elm və Təhsil Nazirliyi tərəfindən mərkəzləşdirilmiş qaydada keçirilən müəllimlərin sertifikasiya imtahanında iştirak etmişdilər. Rayon üzrə ibtidai sinif müəllimlərindən 15 nəfəri, Azərbaycan dili müəllimlərindən 25 nəfəri 50 baldan yuxarı nəticə göstərmişlər.

          2023-cü ildə ali məktəblərə qəbul olunan rayon məzunlarının sayı əvvəlki ilə nisbətən artmaqla 262 nəfər olmuş, onlardan 27 nəfəri 500-600 bal, o cümlədən 7 nəfəri 600-dən yuxarı bal toplamışdır ki,bu da son illərin ən yüksək göstəricisidir.

          Ali məktəblərə qəbulda Ucar şəhər 2, 3, 4, 6 nömrəli, Qazıqumlaq kənd 2 nömrəli, Lək kənd 1 nömrəli, Alpout kənd 1 nömrəli, Qarabörk kənd tam orta məktəbləri daha çox fərqlənmişlər.

          Son illər qabaqcıl təhsil işçilərinin əməyinin qiymətləndirilməsi təhsilin keyfiyyətinə dayanıqlı təkan verməkdədir.

          Azərbaycan Respublikası Prezidentinin 4 oktyabr 2022-cı il tarixli Sərəncamı ilə şəhər 3 nömrəli tam orta məktəbin Coğrafiya müəllimi Fatma Abbasova “Tərəqqi” medalı ilə təltif olunmuşdur.

          2022-2023-cü tədris ilində məktəblərdə vətənpərvərlik tərbiyəsinin gücləndirilməsi prioritet təşkil etmiş, “Cəsurlar”,“Şahinlər” hərbi idman oyunlarında bütün məktəblərin iştirakı təmin edilmiş, bir sıra şagirdlər fənn olimpiadalarının qalibləri kimi respublika turunda fəal iştirak etmiş və fərqləndirici yerlər tutmuşlar.

          2023-cü ildə məktəblərimizdə olan vakant yerlərin doldurulmasına diqqət artırılmış, ehtiyac duyulan fənlər üzrə müəllim yerləri barədə məlumat Elm və Təhsil Nazirliyinə təqdim olunmuşdur. Müəllimlərin işə qəbulu müsabiqəsindən uğurla keçmiş 42 nəfər müddətsiz müqavilə əsasında işə qəbul olunmuşdur.

Dövlət əyani ümumtəhsil müəssisələri 

Dövlət məktəbəqədər müəssisələri